جیکب آباد:(نامه نگار) عیدالاضحیٰ کے موقع پر امن و امان برقرار رکھنے کیلئے پولیس، ضلعی انتظامیہ اور پاک فضائیہ نے مشترکہ فلیگ مارچ کیا۔

جیکب آباد میں عیدالاضحیٰ کے موقع پر سکیورٹی کے سخت انتظامات کے تحت پولیس، ضلعی انتظامیہ اور پاکستان ایئرفورس کی جانب سے مشترکہ فلیگ مارچ کیا گیا۔ فلیگ مارچ سب ڈویژن سٹی، صدر اور شہباز ایئربیس کے اطراف کے علاقوں میں کیا گیا، جس کا آغاز 15 مددگار بیس سے ہوا۔ اس دوران اہم شاہراہوں اور حساس مقامات پر گشت کرکے سکیورٹی صورتحال کا جائزہ لیا گیا۔ فلیگ مارچ میں پولیس، ضلعی انتظامیہ اور پاک فضائیہ کے افسران و اہلکاروں نے شرکت کی۔ پولیس کے مطابق شہریوں میں احساسِ تحفظ پیدا کرنا اور عید کے دوران امن و امان برقرار رکھنا مقصد ہے جبکہ شرپسند عناصر سے نمٹنے کیلئے تمام ادارے مکمل طور پر چوکس ہیں۔