لاہور: ( فریدہ خانم)،
مرحوم اسلم کمال کی 87ویں سالگرہ کے موقع پر الحمرا ادبی بیٹھک، لاہور میں ایک باوقار اور پُراثر تقریب کا انعقاد کیا گیا، جس میں فن، ادب اور ثقافت سے وابستہ ممتاز شخصیات نے شرکت کی اور ان کی زندگی، تخلیقی سفر اور گراں قدر خدمات کو بھرپور خراجِ تحسین پیش کیا۔ تقریب میں مقررین نے اسلم کمال صاحب کے فنی سفر، ذاتی یادوں اور ان کے تخلیقی وژن پر گفتگو کرتے ہوئے بتایا کہ وہ ایک ہمہ جہت فنکار تھے، جنہوں نے خطاطی، مصوری، شاعری اور ادب کے میدان میں کئی دہائیوں تک نمایاں خدمات انجام دیں۔ ان کے فن نے نہ صرف بصری جمالیات کو نئی جہت دی بلکہ ادبی ذوق کو بھی جِلا بخشی۔ مقررین نے اسلم کمال صاحب کے تیار کردہ کتابی سرورق، بصری ثقافت میں ان کے منفرد اسلوب اور نوجوان فنکاروں و لکھاریوں کی حوصلہ افزائی کے لئے ان کی مسلسل کاوشوں کو خصوصی طور پر سراہا۔ اس موقع پر اس بات پر زور دیا گیا کہ اسلم کمال کا کام آج بھی زندہ ہے اور نئی نسل کے لئے رہنمائی اور تحریک کا ذریعہ ہے۔
تقریب کا مجموعی تاثر اس امر کی عکاسی کرتا تھا کہ مرحوم اسلم کمال کا فن اور فکر وقت کی گرد سے محفوظ ہے اور آنے والی نسلوں تک منتقل ہوتا رہے گا۔ ان کی تخلیقی وراثت پاکستانی فن و ادب کا قیمتی اثاثہ ہے۔
آخر میں مرحوم اسلم کمال کی صاحبزادی عظمیٰ کمال اور صاحب زادے فہیم کمال کی جانب سے تمام معزز مہمانوں، مقررین اور حاضرینِ محفل کا دل کی گہرائیوں سے شکریہ ادا کیا گیا، جنہوں نے اپنی شرکت سے اس تقریب کو یادگار بنایا اور اسلم کمال صاحب کی یادوں کو تازہ کیا۔
