تحریر : محمد حنیف کاکڑ راحت زئی
پاکستان کے دیگر صوبوں کی طرح بلوچستان بھی اس وقت متعدد سنگین مسائل سے دوچار ہے۔ امن و امان کی بگڑتی ہوئی صورتحال، مہنگائی میں مسلسل اضافہ، بیرونی سرمایہ کاری کا فقدان، بڑھتی ہوئی غربت اور بے روزگاری نے عوام کی زندگی کو مشکل بنا دیا ہے۔ اس کے ساتھ ساتھ معدنی وسائل (مائنز اینڈ منرلز) پر غیر قانونی لیز الاٹمنٹ نے مقامی آبادی کے حقوق کو شدید متاثر کیا ہے۔
ان مسائل کو گزشتہ عام انتخابات کے تناظر میں بھی دیکھا جا رہا ہے، جن کی شفافیت پر مختلف سیاسی و عوامی حلقوں کی جانب سے سوالات اٹھائے گئے۔ بلوچستان کے عوام کے مطابق کئی حلقوں میں انتخابی نتائج کو متنازع بنایا گیا اور من پسند افراد کو کامیاب کروایا گیا، جس کے اثرات آج بھی صوبے کی سیاسی و معاشی صورتحال پر نمایاں ہیں۔
اگر ضلع قلعہ سیف اللہ کی بات کی جائے تو یہ علاقہ طویل عرصے سے جمعیت علماء اسلام کا ایک مضبوط سیاسی گڑھ رہا ہے۔ یہاں کے عوام نے ہمیشہ اس جماعت اور اس کی قیادت پر اعتماد کا اظہار کیا ہے۔ تاہم، گزشتہ انتخابات میں اس حلقے کے نتائج بھی متنازع رہے، جس کے باعث عوامی نمائندگی کے حوالے سے کئی سوالات جنم لے رہے ہیں۔
اس تناظر میں حضرت مولانا عبد الواسع صاحب کی شخصیت خاص اہمیت اختیار کر جاتی ہے۔ وہ نہ صرف بلوچستان کے ایک سینئر اور تجربہ کار سیاستدان ہیں بلکہ اپنی سیاسی بصیرت، مدبرانہ سوچ اور عوامی خدمت کے جذبے کی وجہ سے ایک منفرد مقام رکھتے ہیں۔ ان کی قیادت میں علاقے کے عوام کو ہمیشہ رہنمائی اور امید ملی ہے۔
مقامی حلقوں کا ماننا ہے کہ اگر حضرت مولانا عبد الواسع صاحب کو کامیابی سے نہ روکا جاتا تو حالات مختلف ہو سکتے تھے۔ بعض آراء کے مطابق انہیں سیاسی طور پر شکست نہیں دی گئی بلکہ مختلف وسائل، مخالف امیدوار کے ساتھ ضلع قلعہ سیف اللہ اور تحصیل مسلم باغ کے وسائل و مسائل پر مبینہ سمجھوتوں اور دیگر عوامل کے ذریعے نتائج پر اثرانداز ہوا گیا۔
بلوچستان بھر کے عوام اور مختلف سیاسی جماعتوں کے کارکنان و قائدین کا یہ بھی کہنا ہے کہ اگر وہ کامیاب ہوتے تو تحصیل مسلم باغ کے معدنی وسائل پر غیر مقامی افراد کا تسلط نہ ہوتا، غیر قانونی الاٹمنٹ کی حوصلہ شکنی ہوتی، بے روزگاری میں کمی آتی، امن و امان کی صورتحال بہتر ہوتی اور ترقیاتی کاموں میں تیزی دیکھنے کو ملتی۔ اسی طرح بجلی کی غیر اعلانیہ لوڈشیڈنگ جیسے مسائل بھی کم شدت اختیار کرتے۔
حضرت مولانا عبد الواسع صاحب کی قیادت کا سب سے نمایاں پہلو ان کی عوام سے قربت اور مسائل کو سمجھنے کی صلاحیت ہے۔ وہ ایک ایسے رہنما کے طور پر جانے جاتے ہیں جو نہ صرف سیاسی بصیرت رکھتے ہیں بلکہ عملی طور پر بھی عوام کے ساتھ کھڑے رہتے ہیں۔ مشکل حالات میں ان کی موجودگی عوام کے لیے حوصلے اور اعتماد کا باعث بنتی ہے۔
آج بھی ضلع قلعہ سیف اللہ اور تحصیل مسلم باغ کے عوام، مختلف سیاسی کارکنان اور کاروباری شخصیات اس امید کا اظہار کرتے ہیں کہ حضرت مولانا عبد الواسع صاحب عوام کو درپیش مسائل کے حل کے لیے مؤثر اقدامات کریں گے۔
آخر میں یہ کہنا بجا ہوگا کہ بلوچستان کے مسائل کا حل شفاف طرزِ حکمرانی، مضبوط قیادت اور وسائل کی منصفانہ تقسیم میں مضمر ہے۔ ایسے میں حضرت مولانا عبد الواسع جیسے مدبر اور مخلص رہنما نہ صرف ضلع قلعہ سیف اللہ بلکہ پورے بلوچستان کے لیے امید کی ایک کرن ثابت ہو سکتے ہیں۔
