ٹورشیا سندھ ایجوکیشن سسٹم کے زیر انتظام ٹورشیا سپر لیگ کا انعقاد کیا گیا

جیکب آباد (رپورٹ: اے جی بلوچ) ٹورشیا سندھ ایجوکیشن سسٹم کے زیر انتظام ٹورشیا سپر لیگ کا انعقاد کیا گیا، جس میں کرکٹ، میراتھن ریس اور ٹگ آف وار کے مقابلے شامل تھے۔ ٹورشیا سپر لیگ کے کرکٹ ٹورنامنٹ کا فائنل میچ پی سی بی گراؤنڈ میں کھیلا گیا، جس میں ٹورشیا سپر کنگز نے ٹورشیا لائنز کی ٹیم کو ستر رنز کے بڑے مارجن سے شکست دے کر ایونٹ کا ٹائٹل اپنے نام کر لیا۔
اس موقع پر مہمانِ خصوصی چیئرمین مہراں سوشل فورم ایڈووکیٹ عبدالحئی سومرو، سینیئر صحافی و ہیومن رائٹس ایکٹوسٹ محمد حنیف جکھرانی، پنہور اتحاد کے محمد حنیف پنہور، وائس چیئرمین تاج ویلفیئر ایسوسی ایشن احمد خان رند سمیت دیگر معزز مہمانوں نے شرکت کی۔
میڈیا سے گفتگو کرتے ہوئے ایڈووکیٹ عبدالحئی سومرو اور صحافی محمد حنیف جکھرانی نے ٹورشیا سندھ ایجوکیشن سسٹم کی کاوشوں کو سراہا اور ان کی حوصلہ افزائی کرتے ہوئے کہا کہ ٹورشیا سندھ ایجوکیشن سسٹم گزشتہ دو برسوں سے تعلیم اور کھیلوں کے میدان میں نمایاں خدمات انجام دے رہا ہے۔ انہوں نے دیگر اداروں کو بھی ایسے ایونٹس کے انعقاد کا مشورہ دیا، ساتھ ہی اعلیٰ حکام اور صاحبِ حیثیت افراد سے اپیل کی کہ جیکب آباد میں تعلیم اور کھیلوں کے فروغ کے لیے عملی اقدامات کیے جائیں۔ جیکب آباد کے نوجوانوں میں بے پناہ ٹیلنٹ موجود ہے، انہیں مواقع فراہم کیے جائیں اور سہولیات مہیا کی جائیں۔
آخر میں مہمانوں کو سندھی ثقافت کی علامت اجرک بطور تحفہ پیش کی گئی، جبکہ مختلف مقابلوں میں کامیاب ہونے والے بچوں میں خصوصی طلائی میڈلز بھی تقسیم کیے گئے۔ یونائیٹڈ اکیڈمی کی جانب سے فائنل جیتنے والی ٹیم کے لیے کراچی ٹور کے ساتھ ساتھ پی ایس ایل کے میچز دکھانے کا اعلان بھی کیا گیا۔
ڈائریکٹر ٹورشیا سندھ ایجوکیشن سسٹم محمد انیس پنہور نے میڈیا ٹیم اور تمام معزز مہمانوں کا شکریہ ادا کیا۔