ٹھٹھہ ڈسٹرکٹ (رپورٹ: ایم اعجاز چانڈیو مہرانوی)
پاکستان پیپلز پارٹی کا 58 واں یومِ تاسیس ٹھٹھہ میں جوش و جذبے، بھرپور عوامی شرکت اور ولولے کے ساتھ منایا گیا۔ اس سلسلے کی مرکزی تقریب محسن ہاؤس ٹھٹھہ میں منعقد ہوئی، جہاں صبح سے ہی پارٹی کارکنوں کی آمد کا سلسلہ جاری رہا اور پورا محسن ہاؤس پارٹی ترانوں اور نعروں سے گونج اٹھا۔
تقریب میں صوبائی وزیر، ضلعی قیادت، مختلف تنظیمی ونگز کے عہدیداران اور ہزاروں پارٹی کارکنوں نے شرکت کی۔ خواتین، بزرگ، نوجوان اور جیالوں نے اپنی روایتی محبت اور وابستگی کا والہانہ اظہار کرتے ہوئے شہید بھٹو خاندان کی لازوال قربانیوں کو خراجِ عقیدت پیش کیا۔
پارٹی رہنماؤں نے خطاب کرتے ہوئے کہا کہ پاکستان پیپلز پارٹی نے ہمیشہ جمہوریت، عوامی حقوق، آئین کی بالادستی اور سیاسی استحکام کے لیے قربانیاں دیں ہیں۔ آج بھی پیپلز پارٹی ملک بھر میں غریب عوام کی آواز ہے اور بھٹو ازم کا فلسفہ ہر دور میں رہنمائی دیتا رہے گا۔
بلاول بھٹو زرداری کا ویڈیو لنک خطاب—تقریب کا مرکزی مرکزِ نگاہ
یومِ تاسیس کی تقریب کا سب سے اہم حصہ چیئرمین بلاول بھٹو زرداری کا ویڈیو لنک کے ذریعے خطاب ہے، جس کے لیے اسٹیج کے سامنے بڑی اسکرین اور جدید صوتی نظام نصب کردیا گیا۔ کارکنوں کی بڑی تعداد بلاول بھٹو کے خطاب کو سننے کے لیے بے چین اور پرجوش دکھائی دی۔
بلاول بھٹو اپنے خطاب میں ملکی سیاسی صورتحال، عوامی مسائل، جمہوری تسلسل، پارٹی کے مستقبل کے لائحۂ عمل اور تنظیمی حکمتِ عملی پر گفتگو کریں گے۔ رہنماؤں کے مطابق چیئرمین کا خطاب آج کی تقریب کا مرکزی محور ہوگا۔
تقریب میں شریک کارکنوں نے کہا کہ پیپلز پارٹی آج بھی ملک کی وہ واحد جماعت ہے جو چاروں صوبوں کی آواز ہے۔ جیالوں نے بلاول بھٹو کی قیادت پر بھرپور اعتماد کا اظہار کرتے ہوئے کہا کہ پیپلز پارٹی کا مستقبل روشن ہے اور عوام کا بھٹو ازم سے رشتہ پہلے سے زیادہ مضبوط ہے۔
