طلبہ میں اسناد و انعامات کی تقسیم، دینی تعلیم کردار و تقویٰ کا نام ہے: ڈاکٹر راغب حسین نعیمی
لاہور ( محمد منصور ممتاز سے )
جامعہ نعیمیہ لاہور میں دینی طلبہ کی علمی، فکری اور ابلاغی صلاحیتوں کو فروغ دینے کے لیے فنِ خطابت کورس کی تکمیل پر ایک پروقار تقریری مقابلہ منعقد ہوا۔ مقابلے میں مختلف درجات کے طلبہ نے بھرپور حصہ لیا اور سیرت طیبہ، اتحادِ امت، عصرِ حاضر کے چیلنجز اور نوجوانوں کی ذمہ داریاں جیسے اہم موضوعات پر مدلل اور پراثر تقاریر کیں۔
تقریب کے اختتام پر نمایاں کارکردگی دکھانے والے طلبہ میں اسناد اور انعامات تقسیم کیے گئے۔ اس موقع پر دارالعلوم جامعہ نعیمیہ کے ناظم اعلیٰ علامہ ڈاکٹر محمد راغب حسین نعیمی نے اپنے خطاب میں کہا کہ حصولِ علم ایک مسلسل جدوجہد کا نام ہے اور علم وہ روشنی ہے جو انسان کی زندگی کو مقصد، شعور اور بصیرت عطا کرتی ہے۔
انہوں نے کہا کہ دینی و عصری تعلیم دونوں کی اہمیت مسلم ہے اور نوجوانوں کو چاہیے کہ محنت، لگن اور اخلاص کے ساتھ تعلیم کے میدان میں آگے بڑھیں۔ علم دین صرف کتابی معلومات نہیں بلکہ کردار، تقویٰ اور عملی زندگی میں اس کے اثرات کا مجموعہ ہے۔ دینی مدارس امت کے روحانی مراکز ہیں اور یہاں کے طلبہ ملت کے روشن مستقبل کے معمار ہیں۔
ڈاکٹر راغب نعیمی نے طلبہ کو نصیحت کی کہ وہ اپنے اساتذہ کا احترام کریں، مطالعہ کو معمول بنائیں اور مختلف فنون میں مہارت حاصل کریں تاکہ معاشرے میں اپنا مثبت کردار ادا کرسکیں۔
