تحریر: محمد منصور ممتاز
26 اپریل کو یومِ شعائراسلام منایا جاتا ہے ۔۔۔اس دن و تاریخ کی اہمیت و حیثیت اپنی جگہ،
مگر ایک صاحبِ ایمان کے لیے سب سے بڑی حقیقت یہ ہے کہ
اسلام کسی ایک دن کا محتاج نہیں، بلکہ ہر دن اسلام کا ہے… اور ہر دن یومِ شعائرِ اسلام ہے۔
شعائرِ اسلام صرف چند الفاظ نہیں…
یہ ہماری پہچان ہیں، ہماری روح ہیں، ہمارا ایمان ہیں۔
یہ اذان کی صدا میں گونجتے ہیں،
یہ مسجدوں کی رونق میں چمکتے ہیں،
یہ ماں کی دعا میں بستے ہیں،
یہ بیٹی کے پردے میں جھلکتے ہیں،
اور یہ سب سے بڑھ کر عقیدۂ ختمِ نبوت ﷺ کی صورت میں ہمارے دلوں میں دھڑکتے ہیں۔
قرآن ہمیں جھنجھوڑ کر کہتا ہے کہ
اللہ کی نشانیوں کی تعظیم دلوں کے تقویٰ کی علامت ہے۔
تو پھر سوال یہ ہے…
کیا ہمارے دلوں میں وہ تقویٰ باقی ہے؟
کیا ہم واقعی شعائرِ اسلام کی عزت کرتے ہیں؟
یا ہم نے دین کو صرف مخصوص دنوں، مخصوص نعروں اور وقتی جذبات تک محدود کر دیا ہے؟
یاد رکھیں!
شعائرِ اسلام کا تحفظ کسی ایک دن کے جلوس، کسی ایک کانفرنس یا کسی ایک تقریر سے ممکن نہیں…
یہ تو ایک مسلسل جدوجہد ہے، ایک زندہ شعور ہے، ایک بیدار ضمیر ہے۔
جب کوئی اذان کا مذاق اڑاتا ہے…
جب کوئی حجاب پر انگلی اٹھاتا ہے…
جب کوئی ختمِ نبوت ﷺ جیسے مقدس عقیدے پر حملہ کرتا ہے…
تو اُس لمحے ہر سچا مسلمان اپنے دل میں یہ صدا سنتا ہے:
“اٹھو! آج یومِ شعائرِ اسلام ہے!”
یہ دن کیلنڈر پر نہیں لکھا جاتا…
یہ دن ایمان کی تختی پر لکھا جاتا ہے۔
ہمیں سوچنا ہوگا…
اگر ہم نے اپنے بچوں کو شعائرِ اسلام سے جوڑ کر نہ رکھا
اگر ہم نے اپنی زندگیوں میں دین کو عملی طور پر نافذ نہ کیا
اگر ہم نے خاموشی اختیار کر لی
تو آنے والی نسلیں ہمیں کبھی معاف نہیں کریں گی۔
وقت کا تقاضا یہ نہیں کہ ہم صرف ایک دن منائیں…
بلکہ وقت کا تقاضا یہ ہے کہ:
ہمارا ہر عمل اسلام کی پہچان بنے
ہماری ہر گفتگو دین کی ترجمان ہو
ہماری ہر سانس شعائرِ اسلام کی محافظ ہو
آج ہمیں یہ عہد کرنا ہوگا کہ
ہم صرف نعرے نہیں لگائیں گے…
ہم عملی طور پر شعائرِ اسلام کے علمبردار بنیں گے
ہم اپنے گھروں میں دین کو زندہ کریں گے
ہم اپنی نسلوں کو اسلامی شناخت دیں گے
ہم ہر سازش، ہر فتنہ، ہر حملے کے سامنے دیوار بن جائیں گے
کیونکہ…
ایک نہیں… ہر دن یومِ شعائرِ اسلام ہے
اور ایک سچے مسلمان کی زندگی کا ہر لمحہ
اپنے دین، اپنے نبی ﷺ، اور اپنے شعائر کی حفاظت کے لیے وقف ہوتا ہے۔
