لاہور (ڈیلی جستجو)بیکنگ جرائم کورٹ نے بانی پاکستان تحریک انصاف (پی ٹی آئی) کے قریبی ساتھی طارق شفیع، حامد زمان اور اسد کاکا خیل کو فارن فنڈنگ کیس سے بری کر دیا۔
لاہور بینکنگ جرائم کورٹ نمبر دو نے مقدمے کا فیصلہ سناتے ہوئے ملزمان کو بری کیا۔ ملزمان کی جانب سے بیرسٹر میاں علی اشفاق نے دلائل پیش کیے۔
ایف آئی اے نے 2022 میں ملزمان کے خلاف مقدمہ درج کیا تھا، جس میں الزام تھا کہ انہوں نے انصاف ٹرسٹ کے لیے غیر ملکی فنڈنگ حاصل کی۔ ایف آئی اے کی جانب سے چالان بھی جمع کروایا گیا تھا۔
ملزمان نے بریت کی درخواستیں دائر کی تھیں، جس پر بینکنگ جرائم کورٹ نے ناکافی شواہد کی بنیاد پر تینوں ملزمان کو بری کر دیا۔
