آبنائے ہرمز سلامتی انتباہ کے حوالے سے امریکی صدر ڈونلڈ ٹرمپ نے کہا ہے کہ اگر اتحادی ممالک اس اہم سمندری راستے کو محفوظ بنانے میں امریکا کی مدد نہ کریں تو نیٹو اتحاد کا مستقبل خطرے میں پڑ سکتا ہے۔
برطانوی اخبار کو دیے گئے ایک انٹرویو میں ڈونلڈ ٹرمپ نے بتایا کہ امریکا اس وقت ایران کے ساتھ رابطے میں ہے۔ تاہم ان کے مطابق تہران کسی معاہدے کے لیے تیار دکھائی نہیں دیتا۔
انہوں نے کہا کہ امریکا تقریباً سات ممالک کے ساتھ آبنائے ہرمز کی حفاظت کے معاملے پر بات چیت کر رہا ہے۔ ان ممالک سے مطالبہ کیا جا رہا ہے کہ وہ اس عالمی تجارتی راستے کے تحفظ میں کردار ادا کریں۔
امریکی صدر کے مطابق اسرائیل بھی اس مقصد کے لیے امریکا کے ساتھ تعاون کر رہا ہے۔
ڈونلڈ ٹرمپ نے مزید خبردار کیا کہ اگر نیٹو ممالک نے اس معاملے میں عملی تعاون نہ کیا تو اس اتحاد کا مستقبل غیر یقینی ہو سکتا ہے۔
انہوں نے یہ بھی اشارہ دیا کہ رواں ماہ کے آخر میں چینی صدر شی جن پنگ کے ساتھ طے شدہ ملاقات میں تاخیر ہو سکتی ہے۔
ان کے مطابق یہ ملاقات اسی صورت میں مفید ہو گی جب وہ ممالک جو آبنائے ہرمز سے فائدہ اٹھاتے ہیں، اس کی حفاظت کے لیے اقدامات کریں۔
اس سے قبل امریکی صدر نے جنوبی کوریا، جاپان، فرانس، چین اور برطانیہ سمیت کئی ممالک سے اپیل کی تھی کہ وہ اپنے جنگی جہاز آبنائے ہرمز کے قریب بھیجیں تاکہ عالمی تیل کی ترسیل محفوظ بنائی جا سکے۔
تاہم اس اپیل کے باوجود عالمی سطح پر ردعمل محتاط رہا ہے۔ اطلاعات کے مطابق فرانس، برطانیہ، جاپان اور آسٹریلیا نے اب تک اپنے بحری جہاز بھیجنے کا اعلان نہیں کیا۔
