اسلام آباد(اے بی این نیوز) گرمی کے موسم میں لیموں پانی نہ صرف پیاس بجھانے والا بہترین مشروب سمجھا جاتا ہے بلکہ یہ صحت کیلئے بھی بے شمار فوائد رکھتا ہے۔ ماہرین غذائیت کے مطابق روزانہ مناسب مقدار میں لیموں پانی پینے سے جسم کو توانائی ملتی ہے اور مختلف بیماریوں سے بچاؤ میں مدد مل سکتی ہے۔
ماہرین کا کہنا ہے کہ لیموں میں وٹامن سی، اینٹی آکسیڈنٹس اور قدرتی منرلز پائے جاتے ہیں جو جسم کے مدافعتی نظام کو مضبوط بنانے میں اہم کردار ادا کرتے ہیں۔ لیموں پانی نظامِ ہاضمہ بہتر بنانے، معدے کی تیزابیت کم کرنے اور جسم سے زہریلے مادے خارج کرنے میں بھی مددگار ثابت ہوتا ہے۔
طبی ماہرین کے مطابق صبح نہار منہ نیم گرم پانی میں لیموں شامل کرکے پینا وزن کم کرنے میں معاون ثابت ہوسکتا ہے جبکہ یہ جلد کو تروتازہ اور شفاف رکھنے میں بھی مدد دیتا ہے۔ اس کے علاوہ لیموں پانی گرمی کے باعث ہونے والی پانی کی کمی کو پورا کرنے میں بھی مفید سمجھا جاتا ہے۔
ماہرین نے مشورہ دیا ہے کہ لیموں پانی میں چینی کا کم استعمال کیا جائے تاکہ اس کے قدرتی فوائد برقرار رہیں۔ تاہم معدے کے السر یا تیزابیت کے مریض ڈاکٹر کے مشورے سے اس کا استعمال کریں۔
