وانا: (ویب ڈیسک) جنوبی وزیرستان کے ضلعی ہیڈکوارٹر وانا میں دہشت گردی کی ایک المناک واردات میں احمدزئی وزیر قبیلے کے بااثر سربراہ اور معروف قبائلی رہنما ملک طارق وزیر سمیت کم از کم تین افراد جاں بحق اور چار زخمی ہو گئے۔
ڈسٹرکٹ پولیس آفیسر (ڈی پی او) محمد طاہر شاہ وزیر کے مطابق، یہ افسوسناک واقعہ وانا کے مصروف ترین علاقے رستم بازار میں گلشن پلازہ کے قریب پیش آیا۔ نامعلوم شرپسندوں نے رات کی تاریکی میں سڑک کنارے آئی ای ڈی (بارودی مواد) نصب کر رکھا تھا۔ صبح کے وقت جیسے ہی قبائلی رہنما ملک طارق وزیر کی گاڑی اس مقام سے گزری، بارودی مواد کو ریموٹ کنٹرول کے ذریعے دھماکے سے اڑا دیا گیا۔
دھماکے کے فوراً بعد مقامی افراد اور ریسکیو اہلکار جائے وقوعہ پر پہنچ گئے اور لاشوں و زخمیوں کو فوری طور پر ڈسٹرکٹ ہیڈکوارٹرز (ڈی ایچ کیو) ہسپتال وانا منتقل کیا۔ میڈیکل سپرنٹنڈنٹ ڈاکٹر جان محمد نے میڈیا کو بتایا کہ ہسپتال میں ایمرجنسی نافذ کر دی گئی ہے۔ زخمیوں میں سے دو افراد کی حالت انتہائی تشویشناک ہے، جنہیں بچانے کے لیے ہنگامی طبی امداد فراہم کی جا رہی ہے۔
دھماکے کی آواز اتنی شدید تھی کہ اس سے پورا علاقہ لرز اٹھا اور مصروف بازار میں شدید خوف و ہراس پھیل گیا، جس کے بعد تاجروں نے اپنی دکانیں اور کاروباری مراکز عارضی طور پر بند کر دیے۔ واقعے کے فوراً بعد سیکیورٹی فورسز اور پولیس کی بھاری نفری نے علاقے کو گھیرے میں لے کر ملزمان کی گرفتاری کے لیے بڑے پیمانے پر سرچ آپریشن شروع کر دیا ہے۔
ملک طارق وزیر کو لوئر جنوبی وزیرستان میں ایک انتہائی بااثر اور محب وطن قبائلی شخصیت مانا جاتا تھا۔ وہ علاقے میں امن و امان کے قیام اور مقامی تنازعات کے حل کے لیے روایتی جرگوں میں ہمیشہ صفِ اول میں فعال کردار ادا کرتے رہے۔ اس سے قبل، دسمبر2024 میں بھی مسلح افراد نے انہیں اغوا کر لیا تھا، تاہم قبائلی عمائدین کی بھرپور کوششوں اور کامیاب مذاکرات کے بعد انہیں رہا کرا لیا گیا تھا۔
سابق سینیٹر مشتاق احمد خان نے اس بزدلانہ حملے کی سخت ترین الفاظ میں مذمت کی ہے۔ انہوں نے مقتولین کے خاندانوں سے تعزیت کا اظہار کرتے ہوئے حکومت اور متعلقہ حکام سے مطالبہ کیا کہ قبائلی اضلاع میں امن و امان کی دگرگوں صورتحال کو بہتر بنانے اور شہریوں کے تحفظ کے لیے فوری اور مؤثر اقدامات کیے جائیں۔
