ڈیرہ غازی خان بیوروچیف چوھدری احمد سے )
دانش اسکول (گرلز) ڈیرہ غازی خان میں جماعت ششم کے داخلوں کا اعلان: آن لائن رجسٹریشن کی سہولت فراہم، اب گھر بیٹھے اپلائی کیا جا سکے گا
دانش اسکول (گرلز) ڈیرہ غازی خان کی پرنسپل میڈم شبنم حبیب صاحبہ کی ہدایت پر تعلیمی سیشن 2027ء کے لیے جماعت ششم (Class 6th) میں مستحق اور ہونہار طالبات کے باضابطہ داخلوں کا اعلان کر دیا گیا ہے۔ اس سال اسکول انتظامیہ کی جانب سے والدین اور طالبات کے لیے ایک بڑی خوشخبری اور اہم سہولت یہ پیش کی گئی ہے کہ اپلائی کرنے کا مکمل طریقہ کار آن لائن کر دیا گیا ہے، جس کی بدولت دور دراز علاقوں سے آنے والے لوگوں کو اب سفر کی سخت تکلیف نہیں اٹھانی پڑے گی اور وہ گھر بیٹھے ہی آسانی سے آن لائن فارم پر کر کے داخلے کے لیے اپلائی کر سکتے ہیں۔
اسکول انتظامیہ اور پرنسپل میڈم شبنم حبیب کے مطابق دانش اسکول میں طالبات کو ماہر اساتذہ کی زیرِ نگرانی جدید اور معیاری تعلیم کی فراہمی کے ساتھ ساتھ مکمل رہائش و بورڈنگ، مفت نصابی کتب، معیاری کھانے (میس)، سائنس و کمپیوٹر کی جدید لیبارٹریز، آرٹ روم اور کھیلوں کے وسیع میدان جیسی تمام تر بہترین سہولیات فراہم کی جائیں گی۔
داخلے مستحق (Merrit/Needy) طالبات اور سیلف فنانس کی دو مختلف کیٹیگریز کے تحت کیے جا رہے ہیں۔ مقررہ شرائط اور نادرا (NADRA) کی تصدیق پر پورا اترنے والی مستحق طالبات کو مکمل طور پر مفت تعلیم، خوراک اور رہائش دی جائے گی، جبکہ سیلف فنانس کیٹیگری کے تحت کل 11 نشستیں (Seats) دستیاب ہیں جن کی ماہانہ فیس 20,500 روپے مقرر کی گئی ہے۔
اہم معلومات و ہدایات:
عمر کی حد: طالبہ کی عمر 10 سے 13 سال کے درمیان ہونا لازمی ہے۔
آن لائن درخواست کی آخری تاریخ: 05 دسمبر 2026ء
داخلہ ٹیسٹ کی تاریخ: 06 دسمبر 2026ء
ٹیسٹ کے اوقات: امیدواروں کے لیے رپورٹنگ کا وقت صبح 10:00 بجے ہے، جبکہ داخلہ ٹیسٹ ٹھیک دوپہر 12:00 بجے شروع ہوگا۔
آن لائن اپلائی کا پورٹل: خواہش مند طالبات ویب سائٹ daanish-school.punjab.gov.pk/register کے ذریعے آن لائن فارم جمع کروا سکتی ہیں۔
مزید معلومات اور تفصیلات کے لیے تاونسہ بائی پاس سے 3 کلومیٹر کے فاصلے پر (نزد ٹول پلازہ) واقع دانش اسکول (گرلز) ڈیرہ غازی خان کے دفتر، فون نمبر 0642470956 یا اسکول کے آفیشل فیس بک پیج سے رابطہ کیا جا سکتا ہے۔
