لاہور: پنجاب کے وزیرِ تعلیم رانا سکندر حیات کی جانب سے اسکولوں میں موسمِ سرما کی تعطیلات میں ممکنہ توسیع کے حوالے سے عوامی رائے جاننے کے لیے ایک آن لائن پول جاری کیا گیا، جس میں اکثریت نے تعطیلات میں توسیع کے حق میں ووٹ دیا۔
وزیرِ تعلیم کے مطابق پول میں والدین، طلبہ اور اساتذہ کی بڑی تعداد نے حصہ لیا اور زیادہ تر افراد نے موجودہ موسمی حالات کے پیشِ نظر تعطیلات بڑھانے کی حمایت کی۔ انہوں نے کہا کہ حکومت عوامی رائے کو مدنظر رکھتے ہوئے حتمی فیصلہ کرے گی۔
رانا سکندر حیات کا مزید کہنا تھا کہ طلبہ کی صحت اور حفاظت حکومت کی اولین ترجیح ہے، اسی لیے تمام ممکنہ پہلوؤں پر غور کیا جا رہا ہے۔ انہوں نے عندیہ دیا کہ پول کے نتائج اور محکمہ تعلیم کی سفارشات کی روشنی میں جلد باضابطہ اعلان کیا جائے گا۔
واضح رہے کہ شدید سردی اور موسم کی صورتحال کے باعث صوبے بھر میں اسکولوں کی تعطیلات میں توسیع سے متعلق بحث جاری ہے، جس پر والدین اور تعلیمی حلقوں کی نظریں حکومت کے فیصلے پر مرکوز ہیں۔
