وزیر اعلیٰ پنجاب مریم نواز شریف کی جانب سے خصوصی افراد کیلئے وہیل چیئرز، الیکٹرک چیئرز اور ٹرائی سائیکل کی تقسیم،

سیالکوٹ 9 دسمبر 2025:ـ سوشل ویلفیئر کمپلیکس سیالکوٹ میں صوبائی حکومت کی جانب سے خصوصی افراد کی فلاح و بہبود کے لیے منعقدہ تقریب میں رکن صوبائی اسمبلی حنا ارشد وڑائچ نے مہمانِ خصوصی کے طور پر شرکت کی۔ وزیراعلیٰ پنجاب مریم نواز شریف کی خصوصی ہدایات پر 18 خصوصی افراد میں وہیل چیئرز، الیکٹرک وہیل چیئرز اور ٹرائی سائیکلیں تقسیم کی گئیں۔
تقریب سے خطاب کرتے ہوئے حنا ارشد وڑائچ نے کہا کہ وزیراعلیٰ پنجاب مریم نواز شریف صوبے کے خصوصی افراد کو بااختیار بنانے اور انہیں معاشرے کا فعال شہری بنانے کے لیے بھرپور اقدامات کر رہی ہیں۔ انہوں نے کہا کہ ’ہمت کارڈ‘ کا اجرا خصوصی افراد کیلئے ایک انقلابی قدم ہے، جس کے ذریعے انہیں تعلیم، صحت، روزگار اور سماجی سہولتوں تک باآسانی رسائی ملے گی۔ ہمت کارڈ کی بدولت خصوصی افراد کو سرکاری سہولتوں میں ترجیحی سروس، مالی معاونت اور دیگر فلاحی پروگراموں میں شمولیت کا موقع بھی ملے گا۔
تقریب میں ڈپٹی ڈائریکٹر سوشل ویلفیئر شریف گھمن اور اسسٹنٹ ڈائریکٹر احمد راٹھور بھی موجود تھے، جنہوں نے محکمہ سوشل ویلفیئر کی جانب سے خصوصی افراد کی رجسٹریشن، انہیں سہولتوں کی فراہمی اور آگاہی مہم کے حوالے سے بریفنگ دی۔ خصوصی افراد کے لواحقین نے وہیل چیئرز کی مفت فراہمی کو قابلِ تعریف اقدام قرار دیتے ہوئے وزیر اعلیٰ پنجاب مریم نواز شریف اور محکمہ سوشل ویلفیئر کا شکریہ ادا کیا۔
ناصر چوہدری سیالکوٹ