نیو ایئر نائٹ کے موقع پر ہوائی فائرنگ کے بڑھتے ہوئے واقعات کے پیشِ نظر حکومت اور قانون نافذ کرنے والے اداروں نے سخت کریک ڈاؤن کا فیصلہ کر لیا ہے۔ متعلقہ حکام کے مطابق ہوائی فائرنگ انسانی جانوں کے لیے سنگین خطرہ ہے اور اس کے نتیجے میں ہر سال قیمتی جانیں ضائع ہوتی ہیں، جسے کسی صورت برداشت نہیں کیا جائے گا۔
پولیس حکام کا کہنا ہے کہ نیو ایئر نائٹ سے قبل اور دوران شہر بھر میں خصوصی ناکہ بندی، گشت اور انٹیلی جنس بیسڈ کارروائیاں کی جائیں گی۔ ہوائی فائرنگ میں ملوث افراد کے خلاف فوری گرفتاری، اسلحہ ضبطی اور مقدمات درج کیے جائیں گے۔ دفعہ 144 کے نفاذ کے ساتھ اسلحے کی نمائش اور فائرنگ پر مکمل پابندی عائد کر دی گئی ہے۔
انتظامیہ نے شہریوں سے اپیل کی ہے کہ وہ خوشی کے مواقع پر قانون کی پاسداری کریں اور کسی بھی مشتبہ سرگرمی کی فوری اطلاع پولیس ہیلپ لائن پر دیں۔ حکام کا مزید کہنا ہے کہ ہوائی فائرنگ کرنے والوں سے کوئی رعایت نہیں برتی جائے گی اور زیرو ٹالرنس پالیسی کے تحت سخت قانونی کارروائی عمل میں لائی جائے گی۔
